በሕልውናው ውስጥ … !! …
ያላለቀው መንገድ … ያልተፈታው ሕልሜ፣
ኑዛዜ ያልሻረው … ያልታደሰው ስሜ፣
ሁሌም ሃጢአተኛ … ክብር የጎደለኝ፣
ቀን መሽቶ ሲነጋ … አምና ላይ የምገኝ፣
ኃጢአት አሞጋሽ … ፈሪ ሰው ነበርኩኝ።
እና … አንድ ቀን ..
ለመሮር ስቃጣ … ለሞት ስንደረደር፣
በአደራ ልቤ … የብድር ሳፈቅር፣
በእውነት የካብኩት … ውሸት ሆኖ ሲገኝ
ያገኝሁት ሳይሆን … ያጣሁት አመመኝ።
ከዛም …
በሩን የከፈተው … የሚያስገባ ገብቶ፣
የሌሎቹን ትቶ .. የሱን ሕይወት ሰጥቶ፣
ከሕልውናው ውስጥ … ቢከተኝ ጎትቶ፣
ያላለቀው መንገድ … ያልተፈታው ሕልሜ፣
ኑዛዜ ያልሻረው … ያልታደሰው ስሜ፣
ባንዳፍታ ተረሳ …
ዳር አልባው አበሳ።
እና
በህልውናው ውስጥ ለተሰወረ ሰው …
መምሸቱም መንጋቱም ያው ለሱ አንድ ነው።
ለሊት በሱ ብርሃን ደምቃለች ስላሉ፣
ቀን ሳትቀድመኝ ብሎ ከሷ መታገሉ፣
ዛሬ አከተመ!! … ከኋላ ያለውን ከፊት ማባረሩ፣
በሕልውናው ውስጥ .. ሳይኖሩ እየኖሩ !!
No comments:
Post a Comment